Dende 1969, o Bar O Polo é un local emblemático que conserva o sabor da tradición en cada recuncho.
No seu interior dispón dunha máquina eléctrica para asar polos, sempre visible ao público, que permite unha cozedura uniforme e saborosa, ademais dunha cociña de leña que preserva o sabor tradicional dos pratos e crea un ambiente cálido e acolledor en calquera época do ano.
Comezos
A historia comezou en 1965 cos fundadores Lilia e Xosé. Naquel ano inaugurouse a Rúa Pintor Laxeiro e, coa apertura desta, a parella aproveitou para ampliar a súa casa, creando a primeira casa da rúa e asentando as bases sobre as que se erguería o bar.
Ese mesmo ano, por motivos persoais, a parella viaxaría a Madrid, onde permaneceron durante unha temporada.
Idea
Durante esa viaxe a Madrid viron por primeira vez un asador de polos e foi alí onde xurdiu a idea de trasladar ese negocio ao pobo onde naceran.
Foi entón, despois de varios anos, en 1969, cando o Bar-Restaurante O Polo abriu as súas portas ao público, con aquela innovadora máquina de asar polos no seu interior. Naquela época, esa tecnoloxía era tan nova que moita xente se achegaba só para ver como funcionaba.
50 anos de historia
Co paso do tempo, o bar consolidouse e gañou a súa propia clientela. Ao manterse aberto en horario de mediodía e ao ofrecer comidas caseiras, atraeu pouco a pouco ás persoas que visitaban as tendas ou se achegaban aos locais en días festivos.
Dende hai máis de 30 anos, Mercedes, sobriña dos fundadores, está á fronte do negocio, servindo tanto o polo como moitas outras receitas tradicionais.
Hoxe en día
Hoxe en día, o bar mantense fiel á súa esencia: ofrece comida para levar, un menú variado e pratos tradicionais elaborados a diario.
O local segue contando cunha cociña de leña que lle da aos pratos ese aroma e sabor únicos, propios da cociña galega, e leva máis de 50 anos servindo a familias como a de Cangado de Rañestras durante as clásicas festas do Cocido de Lalín.
«Financiado pola Unión Europea – NextGenerationEU. Non obstante, os puntos de vista e as opinións expresadas son unicamente os do autor ou autores e non reflicten necesariamente os da Unión Europea. Nin a Unión Europea nin a Comisión Europea poden ser consideradas responsables das mesmas.»
